قصه البطه المغرورة

السلام عليكم يااهل المنتدى الكرام
انا المرة دى جايبلكم القصة بور بوينت
بس برضة هاحكيها علشان تعرفوا الاحداث قبل ماتحملوها

كان يامكان ياسادة ياكرام مايحلى الكلام الا بذكر النبى علية الصلاة والسلام

كانت البطة البطوطة شايفة نفسها اجمل واغنى واحلى بطة واحلى مخلوق على الارض

وفى يوم من الايام قامت البطة وراحت على الجنينة وجمعت ورد وفل وياسمين وعملت بيهم عقد جمييييييييل جدا ولبستة فى

رقبتها وكانت مبسوطة جداا من نفسها وتبص فى البحيرة وتقول لنفسها انا بطة جميلة وشكلى حلو الله على جمالى

انا بطة مفيش حد فى حلاوتى

وفى يوم وهى ماشية تتمشى قابلها الديك وقالها صباح الخير يابطة

قامت البطة ياحبيبى ياحلوين معبرتوش ولا رديت علية السلام ورفعت منقارها لفوق ومشيت وسابتة

والديك كان مستغرب ويقول لنفسة هى البطة مالها حد زعلها

كملت البطة مشى وقابلت القطة وبرضة القطة قالتلها ازيك يابطة عاملة اية

لكن ياعينى البطة برضة ماردتش عليها ورفعت راسها لفوق فى شموخ ومشيت وسابت القطة

وكملت مشى فى الطريق وقابلتها المعزة وقالتلها صباح الخير يابطة وبرضة البطة ماردتش عليها

وفضلت البطة ماشيه رافعة منقارها لفوق ومبسوطة بريشها الجميل والوانها الحلوة والعقد الجميل بتاعها

وبعدين قابلها الخروف الكبير وقالها ازيك يابطة يابطوطة بس ياخسارة برضة ماردتش عليها

ومشى الخروف زعلان ويسأل نفسة هو انا عملت اية وحش ولا عملت اية غلط فى البطة علشان ماتردش عليه

وفضلت البطة ماشية رافعة راسها لفوق فى السماء ومنقارها لفوق ومش باصة قدامها لغاية مادخلت فى عمود كبيييييييير وهى

مش واخدة بالها واتعورت ومنقارها اتعور وجسمها اتجرح وريسها اتقطع والعقد الجميل اتقطع ووقعت على الارض والتراب جه

على ريشها الجميل وقعدت تعيط

بصيت لاقيت كل الحيوانات والطيور اللى سلموا عليها من شوية وهى ماردتش عليهم جاين وبيمدوا ايدهم ليها علشان يشيلوها

من على الارض ومعاهم شنطة الاسعافات الاولية وربطولها منقارها وجروحها

وعرفت البطة انها كانت غلطانه فى حقهم وان ربنا بيجزيها على غرورها

واعتذرت البطة لكل اصحابها وقالتلهم انها هاتجمع ورد وفل وياسمين كتييييييييييير وتعمل عقد لكل واحد منهم

وفعلا عملت لكل واحد عقد جميل ولبستهوله فى رقبتة

ورجعوا اصحاب وحبايب وحلوين مع بعض والبطة البطوطة ماعدتش مغرورة

وتوتة توتة فرغت الحدوتة حلوة ولا ملتوتة

تحياتى ليكم كلكم

سمسمة

اة قبل مانسى الحدوتة بور بوينت ى المرفقات

طبعا انا غيرت بس طريقة السر وحولتها من لغة فصحى جامدة على الطفل للغه سهله شوية ممكن يفهمها الطفل

سلامى للجميع وكل سنة وانتوا طيبين